မန္တလေး၊ မတ်- ၄- ၂၀၂၆
SA(VOM)
စက်သုံးဆီ ခြိုးခြံချွေတာ သုံးစွဲဖို့နဲ့ မော်တော်ယာဥ် မောင်းနှင်ခွင့် ကန့်သတ်ပြီး EV အမျိုးစား ယာဥ်တွေကိုသာ နေ့စဥ်မောင်းချခွင့်ပြုပြီးတဲ့နောက် အရင်က ငုတ်တုတ်မေ့နေတဲ့ EV ဆိုင်ကယ် လောက ဟာဆိုရင် အခု မတ်လမှာ ပြန်လည် ခေါင်းထောင်နေပြီ ဖြစ်ပါတယ်။
မန္တလေးမြို့ဟာ ဆိုရင် ဆိုင်ကယ်ကို အဓိကထားသုံးစွဲကြတဲ့ မြို့တမြို့ ဖြစ်တာကြောင့် စက်သုံးဆီ အသုံးပြုပြီး မောင်နှင်ရတဲ့ ဆိုင်ကယ်တွေ ကားတွေ ဟာဆိုရင် ဆက်သုံးဆီ ပြတ်လပ်တော့မယ် ဆိုတဲ့ ကောလဟလတွေ ထွက်ပေါ်လာပြီးတဲ့နောက် မတ်လ ၃ ရက်နေ့က စပြီး စက်သုံးဆီ ရောင်းချပေးနေတဲ့ ဆိုင်တွေမှာ အချိန်အတော်ကြာတန်းစီနေရပြီး လမ်းပိတ်တဲ့အထိဖြစ်နေပါတယ်။
အမျိုးသားကာကွယ်ရေးနဲ့ လုံခြုံရေးကောင်စီကလည်း မတ်လ ၃ ရက်နေ့မှာ စက်သုံးဆီကို ခြိုးခြံချွေတာသုံးစွဲဖို့အတွက် သတင်းထုတ်ပြန်ပြီးတဲ့နောက် မန္တလေးမြို့က EBike ရောင်းချနေတဲ့ ဆိုင်တချို့ အရောင်းပြတ်သွားပြီးနောက် show room တွေ ပိတ်ထားရတဲ့အခြေအနေထိ ရောက်နေသလို ကျန်ရှိနေသေးတဲ့ဆိုင်တွေမှာလည်း အလုအယက်လာရောက်ဝယ်ယူသူတွေ ရှိနေပါတယ်။
” ကျနော်တို့ Show room ကို ဒီကနေ့ မနက် EV သုံးဘီး ၁၇ စီးရောက်တယ်၊ ရောက်ရောက်ခြင်းပဲ ကုန်သွားပါပြီ၊ လိုချင်သေးရင် နောက် ဆယ်ရက်လောက်နေရင် ရမယ် ဘွတ်ကင်တင်ထားခဲ့ရပါမယ်” လို့ EV မော်တော်ယာဥ်တွေ ရောင်းချနေတဲ့ Showroom တခု အရောင်းတာဝန်ခံကပြောပါတယ်။
လက်ရှိမှာတော့ Ebike တစီးကို အနည်းဆုံး ၁၆ သိန်းက စပြီး အများဆုံး သိန်း ၈၀ ဝန်းကျင်မှာရှိနေပြီး တချို့ ဆိုင်တွေမှာ ပစ္စည်းပြတ်တဲ့အထိ ရောင်းချနေရပါတယ်။
Ebike ဝယ်ယူမယ့် သူတဦးကလည်း ” ကျနော်တို့ ဒီနေ့ ကလေးကျောင်း ကြို/ ပို့ နေ့တိုင်းသုံးနိုင်အောင် Ebike တစီးရချင်တာနဲ့ မန္တလေးမြို့မှာ ပတ်ရှာတာ လိုချင်တာက မရ ဆိုင်တွေမှာ လည်း အရောင်းပြတ်နေပြီ၊ ကုမ္မဏီ တွေကို သွားတော့လည်း ပိတ်ထားတယ်၊ ဖုန်းဆက်တော့လည်း မရ Voice message ပဲ ပို့ခိုင်းနေတာ တမြို့လုံးမှာ EV ဝယ်ဖို့ မလွယ်တော့ဘူး ” လို့ ပြောပါတယ်။
EV ဝယ်ယူသူတွေမှာ ပစ္စည်းပြတ်လပ်မှုတွေကြောင့် အခက်အခဲရှိနေသလို စက်သုံးဆီ အသုံးပြုသူတွေ အတွက်လည်း စက်သုံးဆီ ရရှိဖို့ အခက်အခဲတွေ ဖြစ်နေတာတွေ့ရပါတယ်။
